பிறப்புச் சான்றிதழ்: முழுப் பெயர் மாற்றணுமா - கட்டணம் எவ்வளவு - என்னென்ன ஆவணங்கள் தேவை?

 

பிறப்புச் சான்றிதழில் உள்ள சிறிய எழுத்துப் பிழைகளை நகராட்சி அல்லது ஊராட்சி அலுவலகத்தில் மனு அளித்து, தேவையான ஆவணங்களுடன் எளிதாக திருத்திக்கொள்ளலாம்

பொதுமக்களின் அடிப்படை சட்ட ஆவணங்களில் முக்கியமானது பிறப்பு சான்றிதழ். பள்ளி சேர்க்கை, பாஸ்போர்ட், திருமணம் பதிவு மற்றும் அரசு சேவைகளில் அடையாள ஆதாரமாக பயன்படுகிறது. பெயர் அல்லது பிறந்த தேதி போன்ற விவரங்களில் பிழைகள் இருந்தால் எதிர்காலத்தில் நிர்வாக சிக்கல்கள் உருவாகும் என்பதால் அதை உடனே திருத்தம் செய்வதும் மிக முக்கியமான ஒன்றாகும்.

தமிழ்நாட்டில் பிறப்பு பதிவு முறைகள் தற்போது பெரும்பாலும் டிஜிட்டல் வடிவத்திற்கு மாறியுள்ளன. குழந்தை பிறந்தவுடன் மருத்துவமனைகள் தகவல்களை உள்ளாட்சி அமைப்புகளுடன் பகிர்வதால், பெற்றோர் அலுவலகங்களுக்கு செல்வது குறைந்துள்ளது. பதிவு செய்யப்பட்ட பிறகு crstn.org இணையதளம் மூலம் சான்றிதழை PDF வடிவில் பதிவிறக்கம் செய்யலாம்.

பொதுவாக 21 நாட்களுக்குள் பதிவு செய்தால் அபராதம் இல்லாமல் சான்றிதழ் கிடைக்கும். காலதாமதமான பதிவுகளுக்கு கூடுதல் ஆவணங்கள் மற்றும் சிறிய கட்டணம் தேவைப்படலாம். மருத்துவமனை அறிக்கை மற்றும் பெற்றோரின் அடையாள ஆவணங்கள் இருந்தால் செயல்முறை எளிதாக நடைபெறும்.

பிறப்புச் சான்றிதழில் உள்ள சிறிய எழுத்துப் பிழைகளை நகராட்சி அல்லது ஊராட்சி அலுவலகத்தில் மனு அளித்து, தேவையான ஆவணங்களுடன் எளிதாக திருத்திக்கொள்ளலாம்; இதற்கு பொதுவாக அரசிதழ் தேவையில்லை.

ஆனால் முழுப் பெயர் மாற்றம் செய்ய வேண்டுமெனில் தமிழக அரசிதழில் பதிவு அவசியம். 18 வயதுக்குட்பட்டவர்களுக்கு பெற்றோர் கையொப்பமும், 60 வயதுக்கு மேற்பட்டவர்களுக்கு மருத்துவர் ஆயுள் சான்றிதழும் தேவைப்படும்; பெயர் மாற்றத்திற்கான கட்டணம் ரூ.5,750 ஆகும், இதை karuvoolam.tn.gov.in மூலம் செலுத்தலாம்.

முழுப் பெயர் மாற்றம் போன்ற பெரிய மாற்றங்களுக்கு stationeryprinting.tn.gov.in தளத்தில் விண்ணப்பிக்க வேண்டும். டிஜிட்டல் சேவைகள் விரிவடைந்ததால் பல பதிவுகள் ஆன்லைனில் கிடைக்கின்றன; சரியான தகவல்களுடன் சான்றிதழை பராமரிப்பது எதிர்கால தேவைகளுக்கு முக்கியமானதாகும்.